السلام عليكم ورحمة الله وبركاته
الحمد لله بعد فترة طويلة من اول بوست للبلوج , هنرجع ويارب تكون بداية كويسة ...
التاج ده من( مش قادرة )ربنا يخليها لي يارب , ...
نبطل رغي بقى وندخل ع المفيد
مين اكتر 6 اشخاص بتحبهم؟؟
طبعا بابا وماما واخوتي ..كده كملنا الستة ما شاء الله
وطبعا صحابي اماني وبسمة ومنة وسمر ومي ومها وسارة وجميلة ..ربنا يخليهم لي
هل انت سعيد؟؟
الحمد لله , هو انا دايما باحس بقناعة ورضا عن نفسي واللي حواليا والحمد لله متصالحة مع نفسي جدا .. فبيتهالي هي دي السعادة ..
لو اجتمعت مع حسني مبارك هتقوله ايه؟؟
هقوله كلام كتيييييير , انتوا عاوزين تعرفوا ؟؟
ده كلام بيني وبين بابا حسني وقال يا داخل بين البصلة وقشرتها ..!!
لو معاك مليون ونص هتعمل بيهم ايه؟؟
هتبرع بكام الف للناس الغلابة , وهاخد كام الف احقق بيهم حلم حياتي اني اروح في جولة حول العالم وطبعا هيكون اول حاجة في الجولة دي اني اروح احج انا وماما وبابا واخواتي .. وهفتح مكتب ديكور لاخويا , وصحيفة للشباب اكون انا رئيسة تحريرها طبعا , والباقي هديه لبابا (ده اذا كان في لسه باقي) وبس كده .
بتحب مصر؟؟
جدااااااا , مع اني مش عشت فيها
وبتوحشني اوي لما ببعد عنها ...
ونفسي تكون احسن بلد في الدنيا وربنا يقدرني اني اعمل حاجة عشانها
انت مسلم؟؟
الحمد لله رب العالمين
ليه؟؟
هو انا طبعا لما اتولدت اتكتبت في شهادة الميلاد مسلمة , لكن بعد كده الحمد لله حمدت ربنا كتير اني مسلمة ولو مكنتش اتولدت مسلمة كنت اكيد هسلم بعد كده ...
مين اكتر شخصية متقدرش تستغنى عنها؟؟
والله هو سؤال محير شوية , لانه في ناس كتير في حياتي مقدرش استغنى عنهم ولا اتخيل حياتي من غيرهم اصلا , لكن اكتر حد مقدرش استغنى عنه هو "احمد" اخويا
ايه اكتر موقف محرج؟؟
والله هي كتير ربنا يزيد ويبارك, لكن اكتر موقف محرج حصل معايا انا واماني كنا في يوم خارجين سوا في تدريب في الجرنان وسبحان الله كنا لابسين نفس الالوان بالصدفة طبعا واحنا تقريبا نفس الجسم والطول (في فروقات بسيطة ) بس يومها خدنا شوية تعليقات فظيعة من الصحفيين في الجرنان , اللي يقول رايحين فرح(نظرا للون اللي كنا لابسينه) وحد يقول انتوا اخوات .. ده طبعا غير نظرات الناس لينا في الشارع ... كان يوم .. وقعدنا نضحك فيه كتييييييير
الامنية التي تتمنى تحقيقها؟؟
هي اماااااااااني بصراحة , لكن اكتر امنية اني ابقى صحفية ناجحة باذن الله , وابقى ام وزوجة كويسة وقبل كل ده اني احج قبل ما اموت ... وبس كده
هناك ١١ تعليقًا:
سعدت بتعليقكم على فقرة النادي الاهلي و مبروك للمدونين انضمامكم لكتيبتهم و يارب تفضلوا دايما اصحاب انتيم ،انا قرات ما كتبتوه حاجة مبشرة و اتمنى لكم كل النجاح و التوفيق
باااااااي
السلام عليكم ورحمة الله وبركاته
ميرسي يا فارس على تعليقك الجميل ده , ومنور والله
السلام عليكم
هههههههههههه
إلا اللون الواحد دي في اللبس
حصلت معايا أنا ومنه بردو
في التدريب
في نفس الجورنال
مرتين
كان شكلنا وحششششششششششش
متغيبوش بقى يا عيال
إيه ده
فين التاج التانى
بتاع الملة
وفين اختبار التدوين
على ايدكم الشمال وانتم داخلين
حنخم من اولها
سلاماتي:)
الملة= الحملة
سوري على الخطأ المطبعي:D
السلام عليكم ورحمة الله وبركاته
ميرسي يا مش قادرة على تعليقك الجميل ده وتشجيعك لينا,
ومش هنخم ولا حاجة ان شاء الله
باذن الله هنعمل التاج التاني والاختبار ولا تزعلي نفسك ..
السلام عليكم ورحمة الله وبركاته
كل عام وانت إلى الله أقرب
غفر الله لنا ولك فى رمضان
و ثبتنا على الخير بعد رمضان
ميرسي جدا يا ياسر
وكل سنة وانت طيب واقرب الى الله ان شاء الله
السلام عليكم ورحمة الله وبركاته
اولا احب اهنيكم على مدونتكم الجميلة اوي دي ولو انها جاية متاخرة اوي بس معلش بقى وبجد انا سعيد جدا بيكم لان مبقاش في صحاب كدة في الزمن ده ماعلينا يعني بس بما انكم طبعا بتحترموا اراء الناس انتوا كتبتوا اسئلة ورديتوا عليها فلو سمحتولي ابقى اطرح اسئلة واكون شاكر جدا ليكم ومستني الرد
اخوكم
angel eyes
اولا اهلا وسهلا بيك يا angel eyes ومنور المدونة والله , وانت مش متاخر ولا حاجة اهلا بيك في اي وقت ...
وطبعا اتفضل قول كل الاسئلة اللي انت عاوزها واحنا ان شاء الله هنجاوبك بكل صراحة ..
ياسمين
http://static.tagged.com/images/user3/31/98/80/3198809303-59802041.jpg
السلام عليكم ورحمة الله وبركاته
اولا عايز اقول ميرسي جدا على كلامك والمدونة منورة بصحابها والله وبجد انا سعيد جدا بيكم ومش هطول عليكم وهبدأ الاسئلة علطول بس عايز اقول ان ده كان اختبار كدة اتعمل معايا مرة وعجبني اوي فحبيت اعمله معاكم بسم الله الرحمن الرحيم
ماهو معنى الصداقة بالنسبالكم ؟؟
وايه رايكم في الصداقة ؟؟
هل ممكن الصديق فعلا يحل محل الاخ او يكون زي الاخ ولا لاء ؟؟
ازاي عرفتوا بعض وازاي بقيتوا اصحاب
اوي كدة ؟؟
ايه الصفات المشتركة بينكم ؟؟
هل يوجد صداقة بين رجل ومرآة ؟؟
هل كل صداقة بين رجل ومرآة تؤدي إلى حب ؟؟
ومتى يحدث الحب في رأيكم ؟؟
هل الحب دائماً مرتبط بالحزن ؟؟
وهل يوجد حب حقيقي ؟؟
ما رأيكم في كلا مما يأتي :
الحياة - الموت - الغرور - النفاق
إلى من تحب أن تهدي الزهور الاتية ولماذا
البيضاء - الحمراء - الصفراء
هكتفي بهذا القدر دلوقتي ومتشكر جدا للمتابعة وعايز اقولكم جاوبوا براحتكم يعني لو في سؤال مش عاجبكم متجاوبوش ومستني ردكم ولو هتكملوا انا مستعد متشكر جدا
AnGel eYes
إرسال تعليق