كل سنة وانتوا طيبين بمناسبة شهر رمضان المبارك اعاده الله عليكم باليمن والبركات
والبوست ده هرد فيه على شوية اسئلة كان سالهم زميل وانسان عزيز جدا , هو المفروض الاسئلة دي موجهة لاماني وياسمين , بس معلش ياسمين هي اللي هترد المرة دي ....
نبتدي بالاسئلة ...
ماهو معنى الصداقة بالنسبة لكم ؟
الصداقة هي اجمل العلاقات الانسانية بين البشر , واللي بيتهيالي يعني مش بيدخل فيها اي غرض او مصحلة
ايه رايكم في الصداقة ؟
دايما بحاول احافظ عليها , وانه علاقتي باصدقائي مش تنقطع ابدا ان شاء الله
هل ممكن ان يحل الصديق محل الاخ او يكون زي الاخ ولا لا ؟
هو انا عشان مش عندي اخت في نفس سني فطول عمري بعتبر صحابي زي اخواتي واكتر
ازاي عرفتوا بعض وبقيتوا اصحاب اوي كده ؟
هو انا واماني نعرف بعض من ايام المدرسة لما كنا في تانية ثانوي عن طريق صديقة مشتركة لينا احنا الاتنين , بس وقتها مش كنا صحاب اوي ... لكن لما دخلنا مع بعض نفس الكلية بالصدفة بقينا صحاب اوي وعلى طول مع بعض في كل حاجة .. وكل زمايلنا في الكلية عارفين الموضوع ده ولما مثلا اماني مجتش الكلية ييجوا يسالوني عنها والعكس
والحمد لله انا لما قربت من اماني لقيت انها اطيب وارق انسانة في الدنيا مع انها ساعات بتحاول مش تبين ده ..
ايه الصفات المشتركة بينكم ؟
الصفات المشتركة بيننا كتير والحمد لله اولا نظام حياتنا تقريبا واحد حتى هي ساعات بتحكيلي مواقف عندها في البيت باحس انها بتتكلم عن بيتنا !! ده طبعا غير انه تقريبا نمط تفكيرنا واحد , وبنحب نروح نفس الاماكن . واحنا الاتنين عندنا شوية ( كسل ) وبنحب ننام !! وكمان نعتبر من اصحاب المباديء , وكمان الالتزام في كل شئ يعني على طول بنحضر محاضرات ومش بنغيب الا قليل اوي , ونروح بدري والنظام ده . ده غير انه مستوى التزامنا الديني واحد تقريبا ..
هل يوجد صداقة بين الرجل والمراة ؟
لا , احنا الاتنين راينا كده على فكرة
هل كل صداقة بين رجل وامراة تؤدي الى الحب ؟
اه احنا شايفين كده
متى يحدث الحب في رايكم ؟
عندما تلتقي الروحان ويتوحد التفكير
هل الحب مرتبط دائما بالحزن ؟
ابدا بالعكس , الحب يعتبر من اجمل المشاعر اللي ممكن الانسان يحسها في حياته , المهم انه يختار الشخص الصح
هل يوجد حب حقيقي ؟
اكيد
ما رايكم في كل مما ياتي :
الحياة :عيشها على قد ما تقدر وزي ما تح
الموت :حق علينا جميعا
الغرور:اكتر صفة قاتلة للانسان
النفاق:احقر صفة ممكن يتوصف بيها الانسان
الى من تحب ان تهدي الزهور الاتية ولماذا ؟
البيضاء :الى ماما حبييتي لفضلها الكبير عليا واللي مش هقدر ارد ولو جزء بسيط منه مهما عملت
الحمراء: لاماني صديقة عمري وانتيمتي
الصفراء : هو انا بالنسبة لي اللون الاصفر مش لون الغيرة , انا بعتبره لون الفرح والبهجة وعشان كده ههديها لاخويا احمد الانسان الوحيد اللي في الدنيا اللي بيقدر يخليني اضحك من قلبي في عز ما كون زعلانة
وكمان وردة مني ليك يا انجل ايز وانت اختار لونها زي ماتحب عشان الاسئلة الجامدة دي
ومستنيين كل اسئلتك
وكل سنة وانت طيب ورمضان كريم
هناك ٦ تعليقات:
السلام عليكم ورحمة الله وبركاته
اولا عايز اقولك ميرسي جدا جدا ليكي ياياسمين على ردك على الاسئلة وبجد البلوج كله مشاء الله رائع وكمان كلامك وردودك على الاسئلة مشاء الله اسلوبك جميل جدا وقوي مشاء الله بس كان عندي شوية تعليقات هو بالنسبة للطيبة مش شرط ان الانسان يبينها لان في ساعات ناس بتستغل طيبة الانسان ده في الوصول لاي شيء او حاجة تانية يعني دي في رايي اما بالنسبة للكسل والنوم ده هو ممكن يكون الكسل عيب شوية لكن النوم ده اهم حاجة في الدنيا وبالنسبالي انا مبحبش انام لكن بعتبر النوم مهم لان بيريح الانسان من حاجات كتير من التفكير والقلق والهم والحاجات دي لكن ممكن يكون عيب لو هروب من شيء ده بالنسبة للصفات ندخل بقى على الاراء بصراحة عجبني اوي ردك على سؤال متى يحدث الحب ووصفك للحب بمعنى اشمل لكن مش عارف بشوف ان ساعات الحب بيكون فيه حزن كتير او صعوبات كتير وفشل ويمكن ده بنشوفه مع ناس كتير بس لما بينجح بيبقى شيء رائع جدا جدا وبرده عجبني اوي كلامك عن الورود واختياراتك وبجد سعدت اوي بالاسئلة والاجوبة الجميلة دي وميرسي جدا على الوردة بتاعتك وبهديلكم بوكيه ورد كامل بكل الالوان عشان كل وردة تعبر عن حاجة وميرسي اوي واسف اني طولت عليكم وان شاء الله في اسئلة جاية كمان بس انا عندي اقتراح اننا نعمله برنامج او كرسي اعتراف على شكل حلقات وافضل ان الحلقة الجاية تكون منكم واحب اشوف اسئلتكم ليا المرة دي على ما احضر انا اسئلتي متشكر جدا مرة تانية ولا تالتة بقى مش عارف
سلام عليكم
AnGel eYes
اه صحيح معلش نسيت اقولك وانتي طيبة والله اكرم وكل سنة وانتوا طيبين وبخير وبالتوفيق باذن الله
ميرسي اوي يا انجل على تعليقك ومشاركتك معانا
وميرسي عالبوكيه طبعا ;)
هو اكيد الكسل ده عيب مقلناش حاجة لكنها والحمد لله حاجة مشتركة بيني واماني هو انا بحاول اتغلب عليها وطبعا لما بيجي وقت المذاكرة او الشغل بكون جد جدا ومفيش اي كسل ان شاء الله ..
وطبعا انا موافقاك انه الحب لما بيفشل او بيواجه صعوبات بيكون حاجة صعبة اوي واكيد بتسبب الحزن وساعات الاكتئاب , لكن انا بفترض الاحسن ..
وان شاء الله انا واماني هنحضرلك شوية اسئلة انما ايه !!!
وكل سنة وانت طيب
وميرسي ليك كمان مرة
العفو ياياسمين بالعكس انا سعيد جدا بيكم وبالمدونة الجميلة ومستني الاسئلة الجامدة اوي بتاعتكم وربنا يوفقكم
مش هنسى المرة دي بقى اقول وانتي طيبة والعفو كمان مرة :p
AnGel eYes
من السهل التضحية من اجل صديق لكن الصعب ان تجدالصديق الذي يستحق التضحية ربنايخليكوالبعض
الصديق كالمظلة كلمااشتدالمطر اشتد الاحتياج اليه
إرسال تعليق