ماتفتكروش انه في واحد كان مظلوم وطلع من السجن ولا حاجة .. لا ماالحاجات دي خلاص راح زمانها هي حاجة بسيطة بس فرحت اوي والله زي فرحة الطفل ليلة العيد !!
احكيلكوا من الاول .. كنت في يوم ما راجعة من الكلية وانا على متن الميكروباص السريع لقيت السواق مشي في طريق غير اللي بيمشي منه على طول , قلت يمكن هياخد طريق مختصر ولا حاجة , لقيته فجاة دخل شمال وبيلف عكس الاتجاه وكان هيخبط عربية صغيرة والولد اللي راكب العربية قدام كان هيقع .. المهم الموقف عدى من غير خسائر الحمد لله ..
طب وايه يعني ؟؟ ما بيحصل كل يوم ؟
استنى بس .. وانا بابص بعيد لقيت واحد من المرور (معرفش رتبته بس تقريبا امين) المهم لقيته بيجري على الميكروباص طبعا الميكروباص بيمشي بسرعة فقلت اكيد الامين هياخد النمرة بس ..
وكملنا طريقنا عادي .. وبعدين لقيت الامين نزل من ميكروباص تاني وحصل الميكروباص بتاعنا ووقفه وسحب الرخص وقال للسواق انا هحبسك النهاردة !!
لم اصدق ما رايته بصراحة وانتوا طبعا عارفين ليه ؟؟
طبعا السواق عمل (اتصالاته ) عشان يرجع الرخصة والله اعلم بقى ايه اللي حصل بعد كده .. بس سمعته بيقول انه الامين ده جديد اول مرة يشوفه .
قلت ايييييوة عشان كده
لسه الراجل (نظيف) وعنده ضمير
سبحان الله
الحاجات الطبيعية والبديهية بنستغربها !!
مش عارفة انا ببالغ ولا ايه ؟
بس ربنا يكتر من امثاله ويصلح حالنا جميعا
امين يارب
yasmeen
هناك ١٦ تعليقًا:
أخيراً عملتي بوست؟
أمال فين أماني؟
يارب تكونوا بخير
أولاً : بالنسبة للحاجات اللي كانت مفروض إنها طبيعية ودلوقتي انقرضت وبقت شبه مستحيلة لما بتحصل الواحد بيتعجب فعلاً كأنها معجزة
فكويس إن الأمين الجديد ده جديد لسة وضميره صاحي على الأقل يعمل حاجة واحدة في حياته صح وياخد حسنة على مجهوداته اللي هي واجباته في الأساس
قبل م ياخد اللي فيه النصيب ويخلي سواق الميكروباص بعد كدة يوفر مكالماته وينصص معاه الأجرة
ثانياً: بالنسبو لموضوع الطفلة المصرية خلاص إحنا على أعتاب حرب تانية مع أسرائيل لكنها حرب باردة من نوع اللي يحرق دم الشعب المصري ببطء وسيادته عمال يندد .. بس بقالنا فترة مش بنسمع تنديداته والله قلقنا
تحياتي
ميرسي اوي لتعليقك يا استاذ بجد منورنا والله
انت عندك حق والله بكرة الامين ده يبقى زي غيره .. ربنا يستر
يا سيدي اهو مريحنا من التنديدات ووجع الدماغ ده .. ولا ايه؟
الموضوع نفسه اتكرر معايا وجايز عشان كده أترك تعليق بس لما السواق عمل اتصالاته "وأكيد مبيخالفشى كده إلا اللى له إتصالات" كان نفسى أفضل مع الأمين أسانده مسيبهوش يتراجع أمام الرتبة تبع السواق كان نفسى أشارك بس الظاهر أن الواحد أجبن من كده
يعنى لسة فى أمل فى الدنيا دى وفى البلد دى انها تنضف
mustafa
ميرسي جدا لتعليقك يا مصطفى انا كمان كان نفسي اساند الامين ده بس هي الحكاية مش جبن ولا حاجة بس هعمل ايه؟ طبعا لو حد طلب شهادتي اكيد هقول اللي شفته
yasmeen
barbie girl
ميرسي لتعليقك يا باربي وان شاء الله في امل , بس احنا نعمل اللي علينا ونشجع النماذج اللي زي كده
تحياتي ليكي يا باربي بما انك اول بنوتة تزوري البوست;)
العزيزة
ياسمين
هذه زيارتى الاولى للانتيم وان شاء الله لن تكون الاخيرة
كلام جميل نحن الان فى زمن مقلوب الصح يبقى نادر وغريب والغلط هو ده العادى
شكرا لك
أول زيارة للمدونة الجميلة دي
أماني الموقف ده حصل معايا وكنت راكبة تاكسي
واللي فهمته من السواق أنهم بيسحبوا منه الرخصة ولما بيدفع فلوس بيرجعوها
وغالبا يعني الأمين الجديد اللي بتقولي عليه هيتحول ويبقى كده
مهو أكيد كل اللي قبله الفساد مكنش بيجري في دمهم يعني
الوظيفة بتحولهم تدريجيا لكده
تقبلي مروري
ميرسي جدا لتعليق حضرتك يا استاذ حسن توفيق , بجد تشرفنا بزيارتك لمدونتنا المتواضعة دي..
ويارب متكونش الزيارة الاخيرة
تحياتي لحضرتك
yasmeen
heba
ميرسي جدا لزيارتك للمدونة وتعليقك الجميل ده ..
انا كمان الموقف ده اتكرر معايا كتير , ودايما قرشين بيمشوا المواضيع..
وساعات برده لما سواقين الميكروباصات بيخالفوا بيكون رد فعل الامناء عنيف , مثلا في مرة الامين كسر ازاز الميكروباص عشان كسر الاشارة.. يعني مش من حقه يعمل كده , في اجراءات قانونية..
وخدي من ده كتير
سلامي ليكي يا هبة
yasmeen
السلام عليكم
كان اول مرة اشوف حد بيترشي
كنت في ميكروباس في رمسيس
وعشان امين الشرطة يسمحله انه يعدي
حط ف ايده خمسة جنيه
والمرة الثانية كان كانز
****
انا عارفة انك مبسوطة
وعارفة ومقدرة مشاعرك انتى والبت اماني تجاه هؤلاء اللي ما يتسموا
سواقين الميكروووباااااز
يا شريرة :P
سلاماتي
mesh2dra
هههههههه
انتي عارفة طبعا , احنا قد ايه بنقدر وبنحترم سواقين الميكروباص ;p
اصلنا بنعاني منهم كتير خصوصا اننا زباين دائمين..
انا كمان شفت سواق ميكروباص بيدي للامين كام جنيه عشان يخليه يعدي , بس الكانز دي جديدة بصراحة
ميرسي لتعليقك يا جميل
السلام عليكم ورحمة الله وبركاته
طبعا اولا عايز احييكم بمناسبة رجوعكم للشغل في المدونة مرة تانية ويارب مش تنقطعوا عنها تاني وطبعا نايس بلوج ياياسمين بجد والواحد لو اتكلم على المهازل اللي بتحصل في المواصلات عموما مش هيبطل كلام عنها بالذات انتوا عارفين بطبيعة سفري وكدة بشوف العجب بس بالنسبة للامين مش عارف ممكن يجي عليه يوم ويخالف ضميره عشان اكل عيشه ولو معملش كدة ممكن الكبار يطيروه من الوظيفة بس لو هو راجل جدع بجد يقول عليا وعلى اعدائي مش هبيع ضميري وانا انا كنت عايز احكيلكم على موقف حصل في القطر شوفته بعنيا ولحد دلوقتي مش قادر اصدقه ان شاء الله ابقى احكيلكم عليه
ومرة تانية الف مبروك ياياسمين انتي واماني
AnGel eyes
ميرسي اوي يا انجل اير لتعليقك , معلش انا بقالي فترة مش بشوف البلوج خالص
بس ميرسي اوي لزيارتك لينا, والله هو ممكن الامين اخلف ضميره لما يلاقي كل اللي حواليه كده ده طبعا لو هو انسان ضعيف..
مستنيينك تحكيلنا على موقف القطر ده
تحياتي ليك
yasmeen
ا صحفية والله يا بنت وماشية واخدة بالك من الحاجات بس عندك حق والله طيب دانا لما بشوف عواميد النور منورة بليل مش الصبح بستغرب اوى واقول ياااه البلد نظفت كدا ليه هو فيه حد معدى انهاردة ولا ايه؟؟؟؟
تربيتك بقى يا جيسي :d
عندك حق والله احنا لما نشوف الحاجات الصح دلوقتي نستغرب ونقول اكيد في حاجة زي لما شفت زرع جديد في الكلية مثلا ;)
ميرسي يا جيسي على تعليقك نورتي مدونتنا والله
إرسال تعليق