حسن و بسمة

السلام عليكم...

و عليكم السلام.......

اهداء:هذه الخاطرة مهداه الى كل من خاصمه قلبه لذنب اقترفه ..مهداه الى كل من كان فى قلبه حلم تجمد بفعل الايام الباردة

هذه مهداه للقلب الذى كان ينتظر نورا لم يأت بعد....

حسن و بسمة

ربما و جدت من حولى كلهم جميعا ينتظرون....

ينتظرون من اشتاقت الاعين اليهم,, كل قد علم حبيبه جيدا.... و ما ان انفضوا جميعا حتى تركت وحدى, فسألت نفسى

و لما لا انتظر انا الاخرى؟؟..

و لكن سرعان ما اجابنى قلبى

و من تنتظرين؟؟...!!

انه سؤال و ليس اجابه.!!!

لا...انها الاجابه العارية التى تختبىء وراء سؤال حتى لا ينفضح امرها,,و ليحتفظ قلبى ببعض من كرامته

اما نفسى فكانت تبحث عن شىء..زمنا...احدا لم تعرفه قط..!

و من طول الانتظار مللت روحى و كأن شيأ اوحى لى قائلا "انظرى الى تلك الورقة.."

ورقة شجر....تبدو هزيلة للغاية و كانها تبلغ من العمر الف عام و مع ذلك تحاول بكل ما اوتيت من قوة ان تتشبث بجذورها حتى لا تقع ضحية للرياح الخريفية العاتية التى تلفحها من كل جانب و تسقط كمثيلاتها ليكون مثواها الاخير تحت اقدام السائرين و هم لايكترثون.....!

سمعتها...نعم سمعتها تصبر نفسها بكلمات رقيقة كلما ضربتها الرياح بشدة "تمسكى,,تماسكى فان مع العسر يسرا..ان مع العسر يسرا"...

يااااااه ما اصبرها تلك الورقة ..انها لاتمل.....

كذلك قلبى...... المسكين...... مثل تلك الورقة الصابرة,,مثلها تماما يحاول ان يتمسك بحياته قدر الامكان, و كلما لاقى قسوة و جفاء و احسبه سوف يتوقف و يعتذر عن الحياة..اجده حيا !!! نابضا اكثر و اكثر,,لا يملك خيارا و الا مات "مثلهم" ليكون تحت التراب....

آسفة يا قلبى الحبيب...لم اقصد ايذاءك ابدا,,, لم اسعى لايلامك فى يوم من الايام...

و لكنى ساحاول جاهدة ان ابحث لك عن قلب حسن لا يقسو عليك و لايجفو....

ساجد لك براءة حسن,,صفاء حسن ..قوة حسن ..,عينى حسن التى كلما نظرت اليها وجدتك يا قلبى ترقص فى فؤادى...

ساجد لك نور حسن, صبر حسن.بسمة حسن..سابحث لك عن الشاطر000000!!!!!!!!!!

لن تجديه ابدا.....!!

لماذا يا قلبى..لماذا تقول ذلك..انى احبك لماذا ؟؟؟!!!

لانك لست بسمة..لست بسمة...لست بسمة...!!!!

ياليتك بحثتى عن بسمة...

و من بسمة...من هى؟؟؟؟

انها كما اسمها...لها نقاء,, لها رقة...قوة بسمة اكاد اراها فى عينيها,,,ياليتنى مثل قلب بسمة و ياليتك مثل بسمة....

و نصيحة لا تتمن بسمة حسن و انت تفتقدين الى بسمة بسمة....

آاااااااه يا قلبى,,لم اتوقع منك هذه القسوة,,لم اتمنى غضبك فى وقت كنت لبحث فيه لك عن سعادتك...!!

لما يا قلبى و كأنك تكرهنى و لم تجد من يحبك مثلى...لما؟

حب!!! اتحدثيننى عن الحب؟؟!!!

حب كان بالامس و مضى

حب عاش مريضا و يا اسفى مات و انقضى

حب تضاءل وزنه فاصبح لا يرى...

اسمعى يا هذه.لا تبحثى عن حسن فى الحياة و لكن حاولى ان تجدى بسمة فى نفسك..حاولى ان تجديها فى...

فعندما تكونين بسمة , سيكون حسن

و عندما تجدين بسمة..سيجدك حسن.....

امانى

السلام عليكم....

و عليكم السلام

بسم الله الرحمان الرحيم"لا تؤاخذنى قد بلغت من لدنى عذرا" صدق الله العظيم

اسفة جداااااااااااااا على التاخير الرهيب ده ...

قصة المحروسة مهداه الى كل من يعتبر نفسه غلبان فى هذا الزمان كما انها مهداه ايضا الى كل سلطان....!

"المحروسة"......(2)

قريت الجزء اللى فات؟..ايه..اللى فات مات!!!اممممممم..صحيح اللى فات مات, بس اللى جاى اتبنى على اللى فات,,اما اللى مات فضمير "الغراب" لهف قوت "الغلبان" و لسة برده جعااااااان...
اقول لكم حاجة,, خلينا مع عم غلبان اللى لسة حيران مابين سكوت و كلام,, يسكت و ينسى على ده الحال و له يتكلم و يتبهدل من "السلطان"
مش قادر ينسى و فى نفس الوقت مش عاوز يتهان...........
لأ.....حروح على هناك و مش حستنى معاد يحددهولى السلطان (غراب البين اللى انتوا عارفينه طبعا), من هنا و رايح انا اللى ححدد معاد السكوت و وقت الكلام!!...
عمنا الغلبان خده الحماس.. ياريته يقدر يقول الكلام ده قدام السلطان....
فكرين البرج اياه, بتاع اللى مايتسماش..طلعه عم غلبان و انتوا عارفين اللى حصله من الجزء اللى فات!!!(مش قولتلكم ان اللى جاى اتبنى على اللى فات..!)
و اليكم الحوار المعتاد:-
غلبان: يا صباح الهنا و السعادة على وشك السمح ده يا باشا..(من اولها كدة يا عم غلبان!!!)
سلطان: ايوة ياخويه ايوه ماه انا حقولك ايه ما انت بتعرف تزوق الكلام و "تلزقه" فى بعضه كويس اوى!!!(المشكلة ان السلطان عارفه و حافظه صم...)
غلبان, وقد تذمر: خلاص يابا الحاج خلاص انا اسف, مش راح اصبح على وش "اهلك" بعد كدة,,استريحت...؟!
سلطان: بتبرطم بتقول ايه يا وله...
غلبان: لا ولا حاجة يابا الحاج بقول يعنى انك مش حتصطبح بوشى العكر ده تانى, بس على شرط!!!
سلطان: انت بتتشرط عليه ياض "انت عارف انت بتكلم مييييييين؟؟؟؟؟؟" (الجملة الشهيرة اللى كلنا بنقولها على طول خصوصا لبتوع الشرطة!!!!!)
غلبان: حاش لله ياباشا بقه انا استجرى برده...,بس يعنى كنت طمعان فى كرمك انى اخد من وقت سياتك "5" دقايق...
سلطان: خمس دقايق بحالهم!!!!.......اتفضل
غلبان,من ورا قلبه طبعا: يزيد فضلك,,ربنا بخليك لينا ياعم الحاج,ربنا يعلى مراتبك كمان و كمان,,ربنا...............
سلطان: خش فى الموضوع على طول ياض بدل ماتنضرب بالصرمة القديمة على نفوخك......!!
غلبان: خلاص خلاص حخش فى الموضوع اه,,,,,لما وصلت لاسم النبى حرسها و صاينها "مصر" لقتلك الدنيا زحمة اوى اوى يابا الحاج,,انا بقه بذكائى قعدت اطقص و اشوف ليه الزحمة دى ياواد يا غلبان ليه لييه ليييييييييه؟؟
سلطان:ليه يا وله خللص؟!!
غلبان: اتارى يا باشا,اتارى فى عربية خيشت فى عمود نور!!اموت و اعرف ازاى العربية دى عملت كدة؟؟!! يا سلام يا حاج ده اكيد "عبقرى" اللى كان سايقها!!و طبعا خد الرخصة عن "واسطة و استهبال".. قصدى عن "جدارة و استحقاق"..!!!!
سلطان: و هو ده بقة اللى كان زاحم الطريق؟!!
غلبان: لأ يا عم السلطان دا انا لقيتلك بقه اى واحد يعدى على التخييشة دى يقوم مطلع راسه من شباك العربية زى "عفريت العلبة" بالظبت يطلع راسه فجأه و يدخلها فجأه و يقوم جارى بالعربيه فجأة برده,..و ده كله علشان يتملى فى جمال و روعة المنظر!! ياسلام العربية ضحت بحياتها علشان حب عمرها "عمود النور"!!!!!.....لا و ايه اللى وراه يزمر يولع يتحرق بجاز هو مالوش دعوة,, و لا كائنه سامع من اساسه.......
سلطان: اه و انت بقة كنت زعلان علشان بيضيعوا وقتك "الثمين"
غلبان: لا ياباشا ايه الكلام ده ,,,,اصل انا برده كنت عاوز اتفرج بس اعمل ايه اللى قدامى فضل متنح و فاتح بقه لغايه ماخد و قته و زياده..عارف ياباشا لو رحت هناك بجد بجد "مش حتقدر تغمض عينيك"!!!,المشكلة انه كان فى "قلة مغرضة" زعلانة على الزحمة دى يعنى واحد فاته الامتحان قعد يلطم زى الاهبل وواحدة تانية كانت بتولد و ماتت الحمد لله ربنا ريحنا منها و فى ناس كتيير عبط كدة اتأخروا على شغلهم و اتفصلومنه عااااااادى عدم المؤاخذة يابا الحاج احنا ورانا ايه غير الفرجة خصوصا على "اللحمة و النسوان"
غلبان:و يارتها جت على قد كدة..
سلطان: ايه تانى يا "بغل" ؟
غلبان: و انا ماشى شفت خلق كتيييير اوى بيقولوا بصوت واحد............................!
سلطان: بيقولوا ايه ياض انطق
غلبان: هات ودنك كدة ياعم السلطان.....
سلطان, وقد انفجر غاضبا: يانهارك ملغوص فى الطين...انت ازاى ياض تقول لى الكلام ده,,مين اللى "يسقط" اتكلم!!!!!!!
غلبان,و قد ماااات فى جلده: و الله ياباالحاج مش انا اللى بقول كده ده "هم بيقولوا"!!!
سلطان:"هم" مين ياض اللى "بيقولوا"؟؟!!.
غلبان: هم اللى بيقولوا عليهم "الضايعيين" قصدى "المعارضين" يا باشا......
سلطان: طبعا لازم يقولوا كدة!!!...ماهم مش "وطنييين"!!!!!!!,,اوعى ياض ماتكونش "وطنى " زينا!!!....
غلبان: ازاى ياباشا الكلام ده,دا انا "وطنى" و ستين وطنى كمان هو انا وش ذلك برده ياعم السلطان!!.....
اه يللى عملوكم حكام,, اختزلتم الوطنى اللى فينا فى حزب من الاحزاب..!,الداخل له ينضربه تعظيم سلام و الخارج عنه ياخد اعدااااااااام..!!
اقولكم تعالوا نستأنف الحوار:-
سلطان: ها خلصت اللى عندك و له لسه؟؟!
غلبان: لأ لسه يابا الحاج..
سلطان: اللهم طولك ياروح....
غلبان: طلعت روحك..!!!!!
سلطان:بتجعجع بتقول ايه ياض؟!!
غلبان: مابقولش حاجة يا حاج, انا ساكت.
سلطان: سكت حسك و انخفى اسمك...
اسرها عم غلبان فى نفسه و قال: الميه يا عم السلطان " الميه" (المياه قصده)
سلطان: مالها الميه هى كمان!!!؟
غلبان: مفيش ميه يا عم السلطان, مع انى لما رحت "المحروسة" لقيت "حمام سباحة" كبييييير اوى شكله يطير النفوخ و بيقولو عليه ان ميته "عذبه" كمان!!!!!!!!...
سلطان: اسمه "النيل" ياابو مخ نضيف.....
غلبان: عفارم عليك يابا الحاج هو ده النيل..و بالمناسبة مش مخى بس اللى نضيف لأ ده انا جيوبى كمان "نظيفة",,نظفهلنا بسلمته واحد "نظيف" ربنا يعمر بيته!!!,,,خلينا فى المهم ازاى يبقه عندنا "البحر" دا كله و مش لاقيين نشرب؟؟؟!!
سلطان,وقد وجد الرد المناسب (بالنسبة له طبعا):بص يا روح "مامتك",سميها اقتصاد سميها بخل..هو كده ,,خلاص!!!
غلبان: ماشى اللى تقوله ياباشا...حيس كدة استأذن انا بقه......
سلطان: خد خد خد رايح على فين ياخويه,, امال مولد سيدك "العريان" اللى انت كنت رايحله,,فين المولد ده ياض؟؟!!!...........
غلبان: ههههههههههههه هااااا هههههههههههههاااى
سلطان: بتضحك على ايه ياض يامقصوف الرقبة!!!
غلبان: اصل يا حاج...هههههههه هااااى.................
سلطان:اصل ايه و فصل ايه,,ماتتكلم بدل ماديك "بالبرطوشة" اللى فى رجلى
غلبان: ياااااااااااااااه بقه ياباشا كل ده و مش عارف "مولد سيدى العريان" يطلع ايه,,,,,,,,,,,,تطلع مصر ياباشا "مصر المحروسة" هاهاهاها!!!

قالها الغلبان من قديم الزمان,,مصر دى مولد كله زحام..فيها كل عريان و عريان ياكل مال النبى عليه الصلات و السلام, معروفين بلاسم و العنوان ده سرق فلان و ده نهب علان,, لصوص عريانيين,مكشوفيين و هم فى كل مكان......فكرين نفسهم مستورين عن عيون الغلبان اللى بقه خلاص فى صفحات النسيان!!, فينك يا "عثمان" و انت رحت فين يا "خطاب" تعالوا كلكم شوفوا حاكم غفلان و التانى نيمان...........
و المصيبة انى ماحكتلكمش ربع اللى شافه عم غلبان فى "مولد سيدى العريان"!!!, من فساد لفقر لقلة تعليم و علاج و انتو عارفين الباقى و اللى كان....
فوقوا يا "كتاكيت" قبل ما تبقوا "فراخ" يدبحوكوا فى المواسم و الاعياد.....
..................................
مؤقتا خلص الكلام..و للابد حيعيش الغلبان غلبان!, بدام رضى بالذل و الهوان,, قال ليس فى الامكان افضل مما كان..!!!!, و برده السلطان حيفضل سلطان فى برجه العاااالى فى السرحان...و سلمات يا بلد "الامن و الامان",,و فى الختام اتمنى للكتاكيت (فراخ و ديوك المستقبل) اسعد الاحلام و هم نيام نيام نيااااام
سلالالالالالام.......!

"امانى"

ملحوظة:حسن و بسمة.....قريبا جدا جداااااااا...
-------------------------------------------------------------------------------------------------------------------------------------------------------------------

المحروسة فى عيون السلاطين و الغلابة.....(1)

كان يا مكان..كان و بيكون و حيكون,, و المكان فى كل مكان...
وفى مصر كمان فى الغلبان و فى السلطان...فى كل حارة و زقاق و ميدان حتلاقى سلطان بيحكى مع واحد غلبان...
واحد بس!!! لالالا,,دول كتييييييير عد على قد ماتقدر بشرط ماتكونش تعبان وله زهقان و له زعلان و طبعا يعنى مش عميان...
لأ..بلاش بقة عميانيين..! مش كفاية الغلبان مشى ورا السلطان يقول له يمين يمين ,شمال شمال..!!
و اطوحنا يمين و شمال ,,و اتبهدلنا مابين جنوب و شمال..مالقينا حد يجاوبنا على السؤال المتهان فى كل البلدان

اية اللى بيحصل فينا ده ياربى؟؟!!

و اليكم الحوار المعتاد:-

لما رجع عم "غلبان" لحارته(اللى ساكن فيها) حارة "الغراب" (وهى حارة مصرية ماتلاقيهاش على الخريطة) ..كان عنده اسئلة كتييييييرة ملهاش و لا حتى جواب,,و علشان كدة قرر عم غلبان انه يروح لعمنا "السلطان غراب البين"!(هو اسمه كدة) شيخ الحارة اللى معينه الغراب الكبييييييير اوى (اوعوا تسألونى عن اسمه,ماتودونيش فى داهية)

المهم ان عم "سلطان غراب البين" عايش فى برج عاااااااااااااااالى اوى,علشان تطلعله يتهد حيلك و حيل اللى خلفوك و حيل اللى خلفوا اللى خلفوك!!!

رضى عم"غلبان" و طلع و انتوا عارفين الباقى.............

غلبان:اه اااه..صباح الخير ياعم سلطان باشا..اه اه

سلطان:هو انت ..صباحك لون شعر راسك!!

غلبان:ليه كدة بس يابا الحاج ده انا بصبح عليك..

سلطان:ماتردش عليه ياض بدل ماديك باللى فى.....

غلبان:لالا خلاص انا آسف

سلطان:نهايته,عاوز ايه؟

غلبان:كنت عاوز اخد رايك فى حبة حاجات كدة شفتها لما رحت مصر المحروسة و انا بزور مولد "سيدى العريان"

سلطان:و شفت اية بقة ان شاء الله!!

غلبان:ياهوووووووو,ده انا شفت حاجات كتيره اوى يابا الحاج,,صلى على النبى..

سلطان:عليه الصلاةو السلام

غلبان:و انا داخل على مصر المحروسة عدينا على كوبرى كدة طول السنة السوده بس مش فاكر اسمه,,اسمه ايه ياواد يا غلبان..اسمه ايه ايه؟؟!

سلطان:اسمه المحور يا بأف!

غلبان: ايوااان "المحور يا بأف"!!!!!!

سلطان: يا نهارك مهبب و مطين بطين..انت بتشتمنى و له انت ياض!!

غلبان: ايه يا عم الشيخ,,مش انت اللى بتقول "المحور يا بأف"!

سلطان: خلاص خلاص..دتك نيله على غبوتك,,ماله بقه المحور؟؟

غلبان: هو ليه المحور ده يا عم السلطان بينور الصبح و بيضلم بالليل؟؟!!

سلطان: مش فاهم يعنى ايه يعنى...

اتغاظ "غلبان" و راح قايل فى نفسه -طبعا ما انت قاعد فى العلالى و لا انت دارىبحال الدنيا و الناس الغلابة..اااخ امتى ربنا يخدك......!

سلطان:ماتنطق ياض ..ازاى ده بيحصل؟؟

غلبان:و الله يا با الحاج زى ما بقولك كده و انا ماشى عليه الصبحية لقيت نوره ملعلط,,و لما كنت راجع على هنا بالليل مالقتلكش و لا "لنضة" توحد ربنا قايدة,,لأ و ايه و انت ماشى عليه كدة تحس انك بتلعب "زوبمباظ" قصدى يعنى "جومباظ"!!!

سكت سلطان شويه,,و قال: امر الحكومة يا حبيبى اسية حتعترض و له اييييه؟؟

غلبان(وهو مرعوب طبعا):لألألأ حاش لله يا عم الحاج انا برضه وش ذلك..انا اقدر اعترض!! استغفر الله العظيم..

سلطان:و بعدين انت مستغرب اوى ليه كدة ياخوية..ماه بعد انت ماطليت عليه بسحنتك الجميلة دى مش حينور لا صبح و لا بالليل...

و علسان محدش يقدر يغلب "الغربة" فى الكلام,,غير عم غلبان الموضوع..لأ ده قفل الواضيع كلها,

و قال:طيب يابا الشيخ انا ماشى بقة و حبقه اجى اكمللك بعد كدة انا شفت ايه فى المحروسة

سلطان:بسلامة يا خوية......

مشى "الغلبان" و لسه فى دماغه كلام,,هو كان بدأ اصلا ده لسه مادخلهاش (مادخلش مصر يعنى..فتحوا معايه شويه)

تفتكروا الغلبان فى البلد دى شاف اييييه؟؟

ايوووووووووووه ده شاف حاجات كتير مش فى الحسبان و لاحتى فى اللبان هاهاهاهاهاى.. فى بلد العجايب و القطايف و الكوستبان فى مصر المحروسة.........

و للحديث بقية,مفيش حد حيكمله غير عم "غلبان" بتعنا,,اسمعوه لازم تسمعوه فى المرة الجايه..

وسلالالالالام........

"امانى"

واخيرا ... تاخذ العدالة مجراها !!

ماتفتكروش انه في واحد كان مظلوم وطلع من السجن ولا حاجة .. لا ماالحاجات دي خلاص راح زمانها هي حاجة بسيطة بس فرحت اوي والله زي فرحة الطفل ليلة العيد !!

احكيلكوا من الاول .. كنت في يوم ما راجعة من الكلية وانا على متن الميكروباص السريع لقيت السواق مشي في طريق غير اللي بيمشي منه على طول , قلت يمكن هياخد طريق مختصر ولا حاجة , لقيته فجاة دخل شمال وبيلف عكس الاتجاه وكان هيخبط عربية صغيرة والولد اللي راكب العربية قدام كان هيقع .. المهم الموقف عدى من غير خسائر الحمد لله ..

طب وايه يعني ؟؟ ما بيحصل كل يوم ؟

استنى بس .. وانا بابص بعيد لقيت واحد من المرور (معرفش رتبته بس تقريبا امين) المهم لقيته بيجري على الميكروباص طبعا الميكروباص بيمشي بسرعة فقلت اكيد الامين هياخد النمرة بس ..

وكملنا طريقنا عادي .. وبعدين لقيت الامين نزل من ميكروباص تاني وحصل الميكروباص بتاعنا ووقفه وسحب الرخص وقال للسواق انا هحبسك النهاردة !!

لم اصدق ما رايته بصراحة وانتوا طبعا عارفين ليه ؟؟

طبعا السواق عمل (اتصالاته ) عشان يرجع الرخصة والله اعلم بقى ايه اللي حصل بعد كده .. بس سمعته بيقول انه الامين ده جديد اول مرة يشوفه .

قلت ايييييوة عشان كده

لسه الراجل (نظيف) وعنده ضمير

سبحان الله

الحاجات الطبيعية والبديهية بنستغربها !!

مش عارفة انا ببالغ ولا ايه ؟

بس ربنا يكتر من امثاله ويصلح حالنا جميعا

امين يارب

yasmeen

كلاكيت تالت مرة !!!

السلام عليكم ورحمة الله وبركاته

التاج ده وصلني من "مش قادرة " حبيبة قلبي وربنا يخليها لي يااااارب

لو قالولك اختار اي عصر من عصور مصر عشان تعيش فيه تختار اي عصر واشمعنى؟؟
اختار عصر الفراعنة عشان اشوف مدى التقدم العلمي والحضاري اللي كانوا فيه , واللي الناس دلوقت لسه مش وصلتله

اول اولوية في حياتك عيلتك ولا شغلك ولا اصحابك ؟؟
انا ترتيب الاولويات بالنسبة لي كالاتي
عيلتي
اصحابي
شغلي
لاني شايفة انه اللي بيبقى للانسان هي الذكرى الطيبة عند الناس

ايه اكتر حاجة بتحبها في رمضان ؟؟
الجو الروحاني الجميل اللي بيبقى في رمضان , ولمة العيلة كلها في الفطار والسحور

اوصف ليا اجمل فطار ممكن تفطره ؟؟
لازم يكون في مكان فيه زرع ومياه والجو يكون حلو طبعا .. والاهم من ده كله الصحبة الحلوة , يعني يا اما مع عيلتي او مع صحابي

لو انت حاكم على مجموعة من الافراد هتكون عادل ؟ طب هتعمل ايه عشان تتاكد انك حاكم عادل؟؟
ان شاء الله هحاول اني اكون عادلة ... وهتاكد من كده باني هكون ديمقراطية جدااااا وبالتالي لو الناس لقت انه في ظلم واقع عليها هتقول

اللي بيبوظ الحكام ....نفسهم ولا الشعب ولا الحاشية المقربة؟؟
اللي بيبوظ الحكام نفسهم طبعا قبل كل شيء ... كمان الحاشية المقربة بتلعب دور كبير و لانها بتوهم الحاكم انها الادرى بمصلحة الحاكم وبمصلحة الشعب ... والحاكم بيسمعلها

مين اكتر اعلامي مصري بتحترمه ؟
انا بيعجبني جدا حياد وموضوعية عمرو اديب واسلوبه في الحوار , وكمان بساطة اسلوبه
وكمان مجدي الجلاد شخصية محترمة جدا

قريت ديوان عمر مصطفى صاحب بلوج تجربة "اسباب وجيهة للفرح" عن دار ملامح ولا لسه ؟؟
لا والله.. هبقى اقراه ان شاء الله

لو ممكن تشتغل شغلانة غير اللي انت بتشتغلها او كنت بتشتغلها , كنت تتمنى تبقى ايه ؟
والله هو انا المفروض هكون صحفية وباحب المهنة دي جدا ... لكن كنت عايزة ابقى مصممة ازياء او رسامة لاني باحب الرسم والفن جداااا

ايه تاني بلد تتمنى تعيش فيه بعد مصر ؟؟
انا حلم من ضمن احلامي اني الف العالم واشوف كل دول العالم , فلما احقق الحلم ده هبقى اختار بلد واقولكوا عليها ;d

اوصف ليا ترتيبات اجمل فرح ممكن تحضره ؟؟
ياريت انه يكون عالنيل ... وفي مكان هادئ وتكون موسيقى رومانسية كلاسيك شغالة طول الفرح .. ويكون في ورد لونه روز في كل حتة , والزفة تكون غير تقليدية ... والاهم من ده كله انه يكون العريس والعروسة بيحبوا بعض .... او لو فرح بالتحضيرات دي ياريت يكون فرحي لانه اكيد مفيش حد هيحب فرح هادي كده

بتراعي كلام الناس والقيل والقال ؟؟
للاسف اه

صحيت من النوم ملقيتش الموبايل ولا الكمبيوتر ولا الكاميرا الديجيتال ولقينا نفسنا رجعنا لعصر الحمام الزاجل والحصنة هتبقى سعيد ؟
مش لفترة طويلة .. يعني هنبسط شوية وبعد كده هتعب

السعادة هي ؟
الرضا والقناعة بما قسمه الله للانسان , وانه الانسان يكون متصالح مع نفسه

عندك امل ؟ اسبابك ؟؟
طبعا عندي امل ... لاني مؤمنة بانه ربنا معايا وهيوفقني ومش بينسى عباده ابدا

لما بتحب تهرب من كل شيء بتروح فين ؟؟
بقعد في البلكونة لوحدي .. ان شالله لو الدنيا تلج
لو لو اقدر اخرج اتمشي في اي مكان مفتوح مش مول بقى وكده

امتى اول مرة اخدت فيها نفس طوييييل كده وقلت بينك وبين نفسك يااااه انا كبرت فعلا ؟؟
والله انا ما اخدتش النفس ده خالص لغاية دلوقت

لما بتعمل عمل خيري بيكون ايه هو دافعك الاول ؟؟
رضاء ربنا سبحانه وتعالى

بتشرب سجاير ؟ لو الاجابة اه ايه شعورك لو شفت ست بتشرب سجاير وليه ؟؟
لا الحمد لله ... هو بيقى منظر مقزز طبعا لكن انا شايفة السجاير حاجة مش كويسة في حق الانسان وحرام على الراجل وعلى الست

بتعرف ايدك اليمين من الشمال ازاي ؟
الشمال بكتب بيها واليمين بسلم بيها

ايه اكتر الة موسيقية بتحبها ؟؟
باجب البيانو والكمان والناي

في رايك ليه الذوق والنخوة اتعدموا ؟؟
مين قال كده ؟؟!!

ايه الحاجة اللي لو حصلتلك تبقى سعيد اوي ؟؟
لما اشوف اللي حواليا سعداء , ولما اقدر اسعدهم

تختار يبقى عندك ارض زراعية ولا اجنص عربيات ولا كام عمارة ولا فلوس في البنك ؟؟
ارض زراعية عشان باحب المساحات الخضراء اوي

البحر ولا النيل ؟
البحر طبعا

مركب ولا طيارة ؟
مركب

عاقل ولا مجنون؟
شوية كده وشوية كده

تقرا كتاب ولا تتفرج على فيلم ؟
انا باحب الافلام الاجنبي الرومانسية جدا , لكن لو مفيش اقرا كتاب

بتمرر التاج لمين ؟
بمرره لمدونة "في رحاب الاسلام" بتاعة انجل ايز , ولمدونة " طهقان وطهقانة ...

وبجد انا استمتعت بالاجابة عالاسئلة اللذيذة دي ميرسي يا " مش قادرة " جداااااا
اردهالك في الافراح ;d

وكل سنة وانتوا طيبين
عيد سعيييد

انتيم....على طول

السلام عليكم ورحمة الله وبركاته

كل سنة وانتوا طيبين بمناسبة شهر رمضان المبارك اعاده الله عليكم باليمن والبركات

والبوست ده هرد فيه على شوية اسئلة كان سالهم زميل وانسان عزيز جدا , هو المفروض الاسئلة دي موجهة لاماني وياسمين , بس معلش ياسمين هي اللي هترد المرة دي ....

نبتدي بالاسئلة ...

ماهو معنى الصداقة بالنسبة لكم ؟

الصداقة هي اجمل العلاقات الانسانية بين البشر , واللي بيتهيالي يعني مش بيدخل فيها اي غرض او مصحلة

ايه رايكم في الصداقة ؟

دايما بحاول احافظ عليها , وانه علاقتي باصدقائي مش تنقطع ابدا ان شاء الله

هل ممكن ان يحل الصديق محل الاخ او يكون زي الاخ ولا لا ؟

هو انا عشان مش عندي اخت في نفس سني فطول عمري بعتبر صحابي زي اخواتي واكتر

ازاي عرفتوا بعض وبقيتوا اصحاب اوي كده ؟

هو انا واماني نعرف بعض من ايام المدرسة لما كنا في تانية ثانوي عن طريق صديقة مشتركة لينا احنا الاتنين , بس وقتها مش كنا صحاب اوي ... لكن لما دخلنا مع بعض نفس الكلية بالصدفة بقينا صحاب اوي وعلى طول مع بعض في كل حاجة .. وكل زمايلنا في الكلية عارفين الموضوع ده ولما مثلا اماني مجتش الكلية ييجوا يسالوني عنها والعكس

والحمد لله انا لما قربت من اماني لقيت انها اطيب وارق انسانة في الدنيا مع انها ساعات بتحاول مش تبين ده ..

ايه الصفات المشتركة بينكم ؟

الصفات المشتركة بيننا كتير والحمد لله اولا نظام حياتنا تقريبا واحد حتى هي ساعات بتحكيلي مواقف عندها في البيت باحس انها بتتكلم عن بيتنا !! ده طبعا غير انه تقريبا نمط تفكيرنا واحد , وبنحب نروح نفس الاماكن . واحنا الاتنين عندنا شوية ( كسل ) وبنحب ننام !! وكمان نعتبر من اصحاب المباديء , وكمان الالتزام في كل شئ يعني على طول بنحضر محاضرات ومش بنغيب الا قليل اوي , ونروح بدري والنظام ده . ده غير انه مستوى التزامنا الديني واحد تقريبا ..

هل يوجد صداقة بين الرجل والمراة ؟

لا , احنا الاتنين راينا كده على فكرة

هل كل صداقة بين رجل وامراة تؤدي الى الحب ؟

اه احنا شايفين كده

متى يحدث الحب في رايكم ؟

عندما تلتقي الروحان ويتوحد التفكير

هل الحب مرتبط دائما بالحزن ؟

ابدا بالعكس , الحب يعتبر من اجمل المشاعر اللي ممكن الانسان يحسها في حياته , المهم انه يختار الشخص الصح

هل يوجد حب حقيقي ؟

اكيد

ما رايكم في كل مما ياتي :

الحياة :عيشها على قد ما تقدر وزي ما تح

الموت :حق علينا جميعا

الغرور:اكتر صفة قاتلة للانسان

النفاق:احقر صفة ممكن يتوصف بيها الانسان

الى من تحب ان تهدي الزهور الاتية ولماذا ؟

البيضاء :الى ماما حبييتي لفضلها الكبير عليا واللي مش هقدر ارد ولو جزء بسيط منه مهما عملت

الحمراء: لاماني صديقة عمري وانتيمتي

الصفراء : هو انا بالنسبة لي اللون الاصفر مش لون الغيرة , انا بعتبره لون الفرح والبهجة وعشان كده ههديها لاخويا احمد الانسان الوحيد اللي في الدنيا اللي بيقدر يخليني اضحك من قلبي في عز ما كون زعلانة

وكمان وردة مني ليك يا انجل ايز وانت اختار لونها زي ماتحب عشان الاسئلة الجامدة دي

ومستنيين كل اسئلتك

وكل سنة وانت طيب ورمضان كريم

تاج !!!

السلام عليكم ورحمة الله وبركاته

الحمد لله بعد فترة طويلة من اول بوست للبلوج , هنرجع ويارب تكون بداية كويسة ...

التاج ده من( مش قادرة )ربنا يخليها لي يارب , ...

نبطل رغي بقى وندخل ع المفيد

مين اكتر 6 اشخاص بتحبهم؟؟

طبعا بابا وماما واخوتي ..كده كملنا الستة ما شاء الله
وطبعا صحابي اماني وبسمة ومنة وسمر ومي ومها وسارة وجميلة ..ربنا يخليهم لي


هل انت سعيد؟؟

الحمد لله , هو انا دايما باحس بقناعة ورضا عن نفسي واللي حواليا والحمد لله متصالحة مع نفسي جدا .. فبيتهالي هي دي السعادة ..


لو اجتمعت مع حسني مبارك هتقوله ايه؟؟

هقوله كلام كتيييييير , انتوا عاوزين تعرفوا ؟؟
ده كلام بيني وبين بابا حسني وقال يا داخل بين البصلة وقشرتها ..!!


لو معاك مليون ونص هتعمل بيهم ايه؟؟

هتبرع بكام الف للناس الغلابة , وهاخد كام الف احقق بيهم حلم حياتي اني اروح في جولة حول العالم وطبعا هيكون اول حاجة في الجولة دي اني اروح احج انا وماما وبابا واخواتي .. وهفتح مكتب ديكور لاخويا , وصحيفة للشباب اكون انا رئيسة تحريرها طبعا , والباقي هديه لبابا (ده اذا كان في لسه باقي) وبس كده .


بتحب مصر؟؟

جدااااااا , مع اني مش عشت فيها
وبتوحشني اوي لما ببعد عنها ...
ونفسي تكون احسن بلد في الدنيا وربنا يقدرني اني اعمل حاجة عشانها


انت مسلم؟؟


الحمد لله رب العالمين


ليه؟؟


هو انا طبعا لما اتولدت اتكتبت في شهادة الميلاد مسلمة , لكن بعد كده الحمد لله حمدت ربنا كتير اني مسلمة ولو مكنتش اتولدت مسلمة كنت اكيد هسلم بعد كده ...


مين اكتر شخصية متقدرش تستغنى عنها؟؟


والله هو سؤال محير شوية , لانه في ناس كتير في حياتي مقدرش استغنى عنهم ولا اتخيل حياتي من غيرهم اصلا , لكن اكتر حد مقدرش استغنى عنه هو "احمد" اخويا


ايه اكتر موقف محرج؟؟


والله هي كتير ربنا يزيد ويبارك, لكن اكتر موقف محرج حصل معايا انا واماني كنا في يوم خارجين سوا في تدريب في الجرنان وسبحان الله كنا لابسين نفس الالوان بالصدفة طبعا واحنا تقريبا نفس الجسم والطول (في فروقات بسيطة ) بس يومها خدنا شوية تعليقات فظيعة من الصحفيين في الجرنان , اللي يقول رايحين فرح(نظرا للون اللي كنا لابسينه) وحد يقول انتوا اخوات .. ده طبعا غير نظرات الناس لينا في الشارع ... كان يوم .. وقعدنا نضحك فيه كتييييييير


الامنية التي تتمنى تحقيقها؟؟


هي اماااااااااني بصراحة , لكن اكتر امنية اني ابقى صحفية ناجحة باذن الله , وابقى ام وزوجة كويسة وقبل كل ده اني احج قبل ما اموت ... وبس كده